|
ཀླུ་ཆུ་རྫོང་སྤྱི་བདེ་ཅུས་ཀྱིས་རིམས་ནད་སྔོན་འགོག་དང་ཚོད་འཛིན་བྱེད་པའི་སྐབས་སུ་ རྫོང་ཡོངས་ཀྱི་འགྲིམ་འགྲུལ་ལ་བཀག་སྡོམ་བྱེད་པའི་བརྡ་ཁྱབ་།
ཀྲུང་དབྱང་དང་ཞིང་ཆེན། ཁུལ་དང་རྫོང་བཅས་ཀྱི་རིམས་ནད་ལ་སྔོན་འགོག་དང་ཚོད་འཛིན་བྱེད་པའི་ལས་དོན་གྱི་བཀོད་སྒྲིག་ལག་བསྟར་དོན་འཁྱོལ་ནན་ཏན་བྱེད་ཅིང་། ཁྱོན་ཡོངས་ནས་གསར་བྱུང་གློ་ཚའི་རིམས་ནད་སྔོན་འགོག་ཚོད་འཛིན་གྱི་ལས་དོན་ལེགས་པར་སྒྲུབ་བཞིན། ནད་དུག་མཆེད་པའི་ལམ་བུ་ནུས་ལྡན་ངང་འགོག་པ་དང་། མི་དམངས་མང་ཚོགས་ཀྱི་ཚེ་སྲོག་གི་བདེ་ཐང་དང་བདེ་འཇགས་ལ་འགན་ལེན་བྱེད་པ། རིམས་ནད་སྔོན་འགོག་ཚོད་འཛིན་གྱི་འགག་སྒྲོལ་དམག་འཐབ་མཐའ་གཅིག་ཏུ་རྒྱག་པ་བཅས་ཀྱི་ཆེད་དུ། ཞིང་ཆེན་ཡོངས་སུ་ལག་བསྟར་བྱས་པའི་སྤྱི་པའི་འཕྲོད་བསྟེན་གྱི་རིམ་པ་དང་པོའི་དོན་རྐྱེན་ལ་བརྡ་ལན་སྤྲོད་པའི་བླང་བྱ་དང་ཀན་ལྷོའི་གསར་བྱུང་གློ་ཚའི་རིམས་ནད་མཉམ་འགོག་མཉམ་སྡོམ་ལས་དོན་འགོ་ཁྲིད་ཚན་ཆུང་གི《བརྡ་ཁྱབ》ཀྱི་དགོངས་དོན་གཞིར་བཟུང་སྟེ། ད་ཆ་རྫོང་ཡོངས་ཀྱིས་རིམས་ནད་སྔོན་འགོག་ཚོད་འཛིན་བྱེད་རིང་འགྲིམ་འགྲུལ་བཀག་སྡོམ་ལས་དོན་གྱི་བརྡ་ཁྱབ་བཏང་བ་གཤམ་གསལ་ལྟར། གཅིག 2020ལོའི་ཟླ1པའི་ཚེས27ཉིན་གྱི་ཆུ་ཚོད12ནས་བཟུང་སྟེ། རྫོང་ནང་ཁུལ་གྱི་གླ་བྱེད་རླངས་འཁོར་དང་སྤྱི་སྤྱོད་རླངས་འཁོར་ཚང་མས་གནས་སྐབས་སུ་ལས་གཉེར་བྱེད་མཚམས་འཇོག་དགོས། གཉིས། 2020ལོའི་ཟླ1པའི་ཚེས27ཉིན་གྱི་ཆུ་ཚོད12ནས་བཟུང་སྟེ། རྫོང་མཁར་གྱི་གཞུང་ལམ་སྟེང་སྒེར་གྱི་རླངས་འཁོར་བསྐོར་ནས་ཕྱི་རུ་འགྲོ་མི་ཆོག་པ་དང་། རོང་འབྲོག་སྡེའི་འགྲུལ་བཞུད་འཕྲུལ་འཁོར་རིགས་སྣ་ཚོགས་སྡེ་བའི་ཕྱི་རུ་འབུད་མི་ཆོག་པར་མ་ཟད། མཐའ་འཁོར་གྱི་རིམས་ནད་བྱུང་བའི་ས་ཁུལ་གྱི་མི་སྣ་དང་རླངས་འཁོར་བར་འགྲོ་འོང་བྱེད་པ་མཐའ་གཅིག་ཏུ་གཏན་འགོག་བྱས་ནས་ཕན་ཚུན་རིམས་ནད་འགོ་བའི་ཉེན་ཁ་ཆུང་དུ་གཏོང་དགོས། གསུམ། 2020ལོའི་ཟླ1པའི་ཚེས27ཉིན་གྱི་ཆུ་ཚོད12ནས་བཟུང་སྟེ། རང་ས་གནས་ཀྱི་རླངས་འཁོར་ཁྲོད་ནས་མྱུར་སྐྱོབ་རླངས་འཁོར་དང་མེ་གསོད་རླངས་འཁོར། སྣུམ་ཟོམ་རླངས་འཁོར། ཟོང་སྐྱེལ་རླངས་འཁོར། རོགས་སྐྱོབ་རླངས་འཁོར། ལས་གྲྭའི་རླངས་འཁོར། དམག་མི་དང་ཉེན་རྟོག་པའི་རླངས་འཁོར། དཔང་རྟགས་ཡོད་པའི་བྱ་བྱེད་རླངས་འཁོར་ཕུད་རླངས་འཁོར་གཞན་པ་རྣམས་རང་རྫོང་གི་ས་མཚམས་ནས་ཁ་འབྲལ་མི་ཆོག་པ་དང་། ས་ཆ་གཞན་པའི་རླངས་འཁོར་ཡང་རང་རྫོང་དུ་ཡོང་མི་ཆོག་པར་གཅིག་མཚུངས་ཀྱི་གཏན་འབེབས་ལག་བསྟར་བྱ་དགོས། བཞི། རང་རྫོང་གི་རྒྱལ་ཁབ་རིམ་པའི་གཞུང་ལམ་སྟེ་ལམ་ཐིགG213ནས་རྫོང་མཁར་བར་གྱི་སྦྲེལ་མཐུད་ལམ་ཐིག་དང་། རྒྱལ་ཁབ་རིམ་པའི་གཞུང་ལམ་སྟེ་ལམ་ཐིགG345(ལྷ་མོ་ནས་རྨ་ཆུའི་བར་གྱི་གཞུང་ལམ)། རྫོང་རིམ་པའི་གཞུང་ལམ་སྟེ་ལམ་ཐིག402ལམ་རྒྱུད་ཀྱི་ཨ་ལ་ཤང་ནས་སྒྱིས་ཚང་བར་གྱི་ལམ་དུམ་དང་། ཨ་ལ་ཤང་ནས་ཀླུ་ཞོལ་བར་གྱི་ལམ་དུམ་བཅས་ལ་འགྲིམ་འགྲུལ་བཀག་སྡོམ་བྱས་ཡོད་ཅིང་། ལྷ་མོའི་རྒྱ་སའི་ཟམ་ཁ་ནས་ལྷ་མོ་གྲོང་རྡལ་བར་དུ་ལམ་ཕྱོགས་གཅིག་ཁོ་ནར་རླངས་འཁོར་ཤར་གཏོང་བྱེད་པ། དེ་བཞིན་དུ་རྒྱལ་ཁབ་རིམ་པའི་གཞུང་ལམ་སྟེ་ལམ་ཐིག213ནས་དཔོན་སྐོར་ལུང་མདོ་དང་། དཔོན་སྐོར་སྡེ་བ་ནས་དང་གསེར་ལུང་ཤང་གི་འབྲེལ་མཚམས་སུ་རིམས་ནད་སྔོན་འགོག་ཚོད་འཛིན་བྱེད་ཆེད་ཕྱིར་རང་ཡུལ་ལོག་པར་ཁ་ཏ་བསླབ་བྱ་གཏོང་ཡུལ2བཙུགས་ཡོད་ལ། ལྷ་མོ་གྲོང་རྡལ་རྒྱ་སའི་ཟམ་ཁ་དང་ཀླུ་ཆུ་རྫོང་གློག་སྒྱུར་ས་ཚིགས་སུ་རིམས་ནད་སྔོན་འགོག་ཚོད་འཛིན་ལ་ཞིབ་བཤེར་བྱེད་པའི་ས་ཚིགས2བཅས་བཙུགས་ཡོད་པས། གྲོང་ཁྱེར་ནས་འགྲོ་འོང་བྱེད་མཁན་ཁ་ལོ་བས་རང་འགུལ་ངང་རླངས་འཁོར་བསྐོར་མཚམས་བཞག་སྟེ། རླངས་འཁོར་ནང་སྡོད་མཁན་གྱི་མིས་གོ་རིམ་ལྡན་པའི་སྒོ་ནས་ལས་སྣའི་བཀོད་འདོམས་ལྟར་ལུས་དྲོད་ལ་ཞིབ་དཔྱད་ཚད་ལེན་བྱེད་པར་གཞོགས་འདེགས་བྱ་དགོས། ལྔ། རླངས་འཁོར་བཀག་སྡོམ་གྱི་གཏན་འབེབས་དང་ལེན་མི་བྱེད་མཁན་ལ་སྤྱི་བདེ་ལས་ཁུངས་ཀྱིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་དོ་དམ་ཆད་གཅོད་བཅའ་ཁྲིམས》དང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགྲིམ་འགྲུལ་བདེ་འཇགས་བཅའ་ཁྲིམས》ཀྱི་འབྲེལ་ཡོད་གཏན་འབེབས་གཞིར་བཟུང་སྟེ། ཡུལ་དངོས་ནས་ཞིབ་བཤེར་ཐག་གཅོད་དང་ལག་རྩལ་རང་བཞིན་གྱི་ལྟ་རྟོག་བྱ་ཐབས་བཀོལ་ནས་ཚོད་འཛིན་བྱེད་པའམ་པར་ལེན་པ་སོགས་ཀྱི་བྱ་ཐབས་སྤྱད་དེ་ཆད་པ་གཅོད་རྒྱུ་ཡིན་པར་མ་ཟད། བཀག་སྡོམ་དང་ལེན་མི་བྱེད་པར་བྱས་ཉེས་བཟོས་ཏེ་ཁྲིམས་དང་འགལ་ཚེ་ཁྲིམས་ལྟར་ཉེས་དོན་འགན་འཁྲི་རྩད་གཅོད་བྱེད་རྒྱུ་ཡིན། དེ་མིན་བཀག་སྡོམ་བྱེད་མཚམས་འཇོག་ཚད་ཀྱི་བརྡ་ཐོ་རྗེས་ནས་བཏང་ཡོང་བས་རྒྱ་ཆེའི་གྲོང་ཁྱེར་དང་གྲོང་གསེབ་ཀྱི་ཡུལ་མིས་ཐུགས་ཁུར་དང་རྒྱབ་སྐྱོར་གནང་རོགས་ཞུ། ཀླུ་ཆུ་རྫོང་སྤྱི་བདེ་ཅུས། 2020ལོའི་ཟླ1པའི་ཚེས27ཉིན།
碌曲县公安局关于在疫情防控期间 对全县道路交通进行管制的通告
碌曲县公安局 2020年1月27日 |
